Budu tasi

                  RIKEZA NE’EBÉ MAK ITA LADU’UN KUÑESE 

  

Mateus dos Santos Ximenes*

Email: mattsantos26@yahoo.com

1.     Introdusaun

Algae hanesan aihoris tasi ne’ebé bele moris namlele ka bele mos sai hanesan fitobentos ne’ebé mak bele moris tidin ka belit iha tasi okos. Se ita haree liu deit tipu budu tasi ne’ebé mak hatudu forma liur hanesan abut, hun, tahan no balun nebe kuaze atu hanesan ho fuan, maibe ida nee hotu hanesan la real. Algae ne’e hanesan aihoris ne’ebé mak moris mai laiha abut, hun no tahan, jeralmente ita haree hanesan hun deit ne’ebé mak hanaran  Thallus ida ne’ebé somente iha forma nebe mak variavel. Nia substânsia mos oi-oin, balun mamar, toos no iha substânsia hanesan ahur (Kapur), abut barak no kiikoan no seluk tan. Algae ne’ebé mak nia medida boot ka makroalgae tama ba iha divizaun 3 mak algae matak, kor kafé no mean. Kada divizaun iha nia tipu konteudu pigmentu. Iha parte seluk, budu tasi ka makroalgae (Phycophyta) hanesan organizmu tasi ida ne’ebé iha papel ba iha siklu kadeia alimentar hanesan produtór primeiru. Jeralmente definisaun algae ka budu tasi hanesan grupu aihoris nivel baixa ho lalaok fotótrofu ne’ebé mak laiha abut, hun no tahan nebe real, maibe iha Thallus ne’ebé nia funsaun sai órgaun vezetativu (Thallophyta)(Reskika., 2011).

Budu tasi kaer papel importante biolózikamente no ekolózikamente ba ekosistema tasi. Iha area tasi ibun nian budu tasi moris iha area  ne’ebé tasi maran ba, no ba area subtidal budu tasi moris iha tasi laran ne’ebé loron matan sei bele fo naroman 0.01% husi nessesidade luz ba prosesu fotosinteza (Domettila et al., 2013). Hó ida ne’e, utilizasaun budu tasi ho ekonomikamente aplika ona husi nasaun Xina no Japaun komesa husi tinan 1670 hanesan aimoruk, hahan adisional, kosmetika, hahan (pakan) ba animal hakiak sira no adubu orgâniku. Budu tasi utiliza hanesan hahan lor-loron ba populasaun japaun, xina no korea, no iha tinan 2005 valor konsumidor ba budu tasi sa’e besik US$ 2 millões. Iha parte seluk, iha timor leste hanesan mos husi iha rai seluk, iha balun deit mak ita aproveita maibe barak mak la aproveita no sai hanesan foer iha tasi ibun (Yunizal, 1999).  

Timor Leste hanesan nasaun joven ida ne’ebé mak foin ukun an iha sékulu 20 hafoin deklara nia independensia iha tinan 2002. Timor leste deklara nia luan hamutuk 15.874 Km² iha tinan 2017 ho total populasaun tuir sensus 2015 hamutuk  1.167.242.

Budu tasi ou algae (seaweed) hanesan fontes rekursus naturais ida ne’ebé mak boot tebes iha Timor Leste maibe se ita haree ba iha prosesu esportasaun sei kiik liu kompara ho nasaun viziñu hanesan Kupang-Indonesia ne’ebé jeografikamente sei rai ida deit ho total toneladas 630.000 komposto husi (toneladas 560.000 budu tasi bokon no toneladas 70.000 budu tasi maran) iha tinan 2017 ho valor osan besik  Rp.560 000 Miliar (US$7.840.000 ho kurs Rp.14.000). Tan ne’e, ita tengki tau matan ba potensia husi budu tasi ne’ebé mak iha tengki promove nafatin bazeandu nia diversidade ne’ebé mak boot iha ita nia tasi.

Optimalizasaun budu tasi iha timor oras ne’e to’o de’it hanesan hahan ne’ebé mak konsume ba populasaun sira ne’ebé mak hela besik iha area tasi ibun, tanba seidauk iha instituisaun ka parte relevansia ruma ne’ebé mak haree ba potensia husi budu tasi nee.

Review ida ne’e atu fo informasaun ba ita hotu kona ba potensia budu tasi hanesan iha aspetu industria no saúde hodi nunee bele aumenta ita nia kuñesimentu ba diversidade budu tasi nebe fungsional no fo vantajen ba saúde no industria iha Timor Leste. Optimalizasaun ba budu tasi hodi hasai potensia boot husi budu tasi ida nee, hodi fo alternativa ba problemas mal nutrisaun no krize ekonómika iha rai laran.

2.     Deskrisaun algae ka budu tasi

Budu tasi ka algae (seaweed) hanesan ai horis tasi ne’ebé mak tama iha makroalgae benthik ne’ebé barak moris iha tasi okos. Budu tasi hanesan algae ida ne’ebé too agora seidauk bele iha diferensia entre abut, tahan no nia hun (Thallus) ne’ebé mak halo parte iha divizaun Thallophyta (Suparmi, 2009, Soenardjo, 2011). Utilizasaun ba budu tasi ho ekonomis halao ona husi nasaun Xina ho Japaun desde 1670 hanesan  ai moruk, hahan adisional, kosmétika, hahan ba animal, no adubus orgániku (Suparmi, 2009). Klasifikasaun ba budu tasi bazeia ba kontentu pigmentu hamutuk tolu mak tuir mai ne: budu tasi mean (Rhodophyta), budu tasi matak (Chlorophyta) no budu tasi kor kafé (Phaeophyta) (Soenardjo, 2011).

Iha parte seluk, fatin moris prinsipal ba  budu tasi ne’e nian, iha oin rua mak, substratu ne’ebé mamar hanesan tahu, rai henek  ka rai henek kahur tahu no substratu ne’ebé mak to’os mak hanesan ahu ruin no fatuk, ahu ruin mate. Iha tasi substratu ne’ebé mak mamar, moris espésie Halimeda, Caulerpha, Gracilaria, no Hypnea entertantu iha tasi ne’ebé nia substratu to’os, moris espésie hanesan Enteromorpha, Ulva, Sargassum no Turbinaria (Ferawati et al., 2014).

3.     Vantajen husi algae

Iha Timor leste, Budu tasi hanesan hahan ida ne’ebe mak ema konsume ho kondisaun matak hanesan kahur ba aimanas liliu ba komunidade sira nebe mak hela besik tasi ibun. Iha grupo hirak husi budu tasi nebe mak koñesidu iha mundu komersiu ne’ebé bele sai hanesan material ba industria farmásia, kosmetika, ai han no iha hirak ne’ebé mak sai hanesan aimoruk. Ezemplu hanesan ;

a.      Algae matak (Chlorophyceae)

Éspesie algae husi klase Chlorophyceae jeralmente ho kór matak ho karakterístiku thallus komposto hanesan tahan, hun no kabuar nebe bele mamar nomos to’os ou siphonous mak kompostu husi uniselula ka multiselula. Algae ida ne’e babain nia moris fatin iha tasi been nomos bee babain. Alende nia pigmentu ne’ebé prinsipal hanesan klorofila, budu tasi matak mos iha pigmentu hirak ne’ebé mak tama iha karotenoide. Karotenoide ne’ebé mak iha budu tasi matak mak hanesan; β-karoteina, luteina, violaxanthina, antheroxanthina, zeaxanthina no neoxanthina (Atmadja et al., 1996; Burtin, 2003). Iha rezultadu husi peskiza ida ne’ebé mak fo hatudu kompozisaun pigmentu ba algae matak mak klorofila a (26,817 %), klorofila b (7.525%), nomoos xantofila (41.546%) (Kusumastuti, 2008).

Naran espésie	Aimoruk/aihan
1.       Caulerpa lentillifera	·         Aihan ba ema ·         Aimoruk anti fungos ·         Aimoruk hatuun tensaun aas
2.       Caulerpa racemosa	·         Aihan ba ema ·         Iha konteudu vitamina folic
3.       Halimeda macroloba	·         Aimoruk anti fungos ·         Iha konteudu substansia kresimentu auxin, giberellin no cytokinin
4.       Enteromorpha intestinalis	·         Aihan ba ema ·         Iha konteudu vitamina E ·         Iha konteudu proteina ·         Fontes fecoperocol ·         Aimoruk anti bakteria
5.       Ulva lactuca	·         Aihan ba ema ·         Aimoruk ba lumbriga ·         Iha konteudu proteina
6.       Ulva pertusa	·         Hamenus nivel plasma kolesterol ·         Iha konteudu vitamina folic no ásidu folinic
7.       Sargassum spp.	·         Aihan ba ema ·         Iha konteudu proteina, vitamina C no Iodine ·         Aimoruk ba gondok, anti tumor no anti bakteria ·         Fontes alginat, tanin no fenol
8.       Euchema spinosum	·         Fontes karaginan ·         Kontrola polusaun metal Pb. No Cd.
9.       Gracilaria arcuata	·         Aihan ba ema no fontes agar ·         Area bakteriologia ·         Iha konteudu substansia regulador moris auxin, giberellin no sitokinin.

          Tabela 1. Algae sai hanesan hahan no aimoruk (Trono & Ganzen, 1998)

Hahan rezerva ne’ebé mak rai iha nia thalli mak hanesan Kanji (starch), proteina, amino ácido no Lípida. Komposto kímiku ne’ebé mak domina liu mak Vitamina C hanesan iha genus Caulerpa too 1000-32001 U/mg. No budu tasi matak iha Koloid ne’ebé mak menus ka laduun aas (Dubinsky et al 1978).

·         Iha area pekuária budu tasi sai hanesan hahan ne’ebé mak kahur ba hahan karau nian.

·         Iha parte seluk budu tasi matak bele falun hahan iha industria ai han nian ne’ebé han kedan ho hahan ne’ebé mak nia falun ba. Grupu budu tasi matak kuñesidu mos hanesan modo tasi ou “ Sea Vegetable” ne’ebé nia funsaun sai hanesan anti fungus, anti bakteria, no alta tensaun (Smith and Yonge, 1955; Trono & Ganzon, 1988).

 b.     Algae kor kafé (Phaeophyceae)

Iha algae kor kafé ida ne’e ezisti espésie 28 ne’ebé mak husi gêneru 6 mak: Dictyota, Padina, Hormophysa, Sargassum, Turbinaria, dan Hydroclathrus. espésie budu tasi ne’ebé mak identifika ona mak  Sargassum sp. hamutuk espésie14, Turbinaria hamutuk espésie 4, Hormophysa espésie 1, Padina  espésie 4, Dictyota  espésie 5, no Hydroclathrus  espésie 1 (Yunizal, 2004).

Tuir péritus ida naran Atmadja., (2012) hatete katak budu tasi moris iha area ho nia klean metru 0.5-10. Budu tasi kór kafé moris iha tasi ne’ebé ho nia substratu iha koral nia isin lolon no moris diak iha area tropis. Iha sorin seluk, tuir Majid (2012) algae kór kafé moris hanesan aihoris ho sanak hanesan tali ki’ik oan ne’ebé kabeer (Ectocarpus), hó sanak badak no nia thallus luan (Copstaria, Alaria, no Laminaria, iha balun entre sira nia luan metru 2). Alende ida ne’e, Sargassum fillipendula mos iha pigmentu klorofila a no b, beta karoten, violasantina no fukosantina. Maske iha pigmentu seluk, maibe fukosantina domina liu hodi fó kor kór kafé tuan to’o kinur kór kafé iha nia kór. Fukosantina hanesan xanthophyll (C₄₂H₅₈O₆), hanesan pigmentu iha chloroplasts ne’ebé fó kór kafé ka matak olive. Fukosantina absorve naroman primeiru hodi fó kór ba parte kór ajul-matak to’o kinur – matak husi spektrum ita haree hó nia variasaun no absorbsaun signifikativu hó nia wavelength (panjang gelombang) 400 - 500 nanometru (Wang., 2006, no Aline., 2009 )

Budu tasi ou algae kor kafé ida nee nia moris fatin prinsipal mak iha tasi deit no algae ida ne’e koñesidu hanesan produtor ba algin no iodine. Konteudu koloidu ne’ebé mak prinsipal tebes mak algin, ne’ebé ekstrak husi genus Sargassum, Turbinaria, Macrocystis no Padina. Konteudu koloidu algin iha;

·         Industria kosmétika, uja hanesan material atu halo sabaun, pomade, cream, body lotion, shampoo no pinta fuuk.

·         Industria farmasia, uja hanesan material atu halo kapsula aimoruk nian, tablet, saleb, emulsifier, suspensaun no estabilizer.

·         Parte agrikultura, uja hanesan material hodi kahur ba insektisida no guarda ba ai,

·         Nunee mos ba parte industria hahan nian, mak hanesan sai material ba produtus saus no mantega. Vantajen seluk, uja iha industria fotografia, surat tahan, tekstil, no keramik.

·         Iha saúde nian, iodine ne’ebé mak eziste iha grupo alginofit bele uja sai hanesan ai moruk hodi prevene moras “gondok”.

c.      Algae mean (Rhodophyceae)

Algae ka budu tasi mean ida ne’e koñesidu hanesan produtor ba karagenan no agar. Karakterístika thalli nia konteudu husi pigmentu fikobilina husi fikoeritrina ho kor mean no ho karakter adaptasaun kromátiku. Proporsaun pigmentu bele hamosu kor oi-oin iha thalli hanesan; kor kafé, violet, mean tuan, mean nurak no matak. Rezerva hahan iha thalli hanesan kanji (floridan starch). Algae ida ne’e prinsipalmente moris iha tasi no ituan mak moris iha bee bai-bain.

·         Budu tasi mean iha konteudu koloidu prinsipal mak karagenan ho agar. Karagenan ekstrak husi grupo karagenofit hanesan genus Euchema, Gigartina, Rhodimenia, no Hypnea. Karaginan husi grupu ida nee bele utiliza ba iha industria ai han nian. Algin husi karaginat bele utiliza hanesan material kosmetika, farmásia, pastadente no salep (Wahidulla et al. 1986).

·         Koloidu agar ekstrak husi grupu agarofit mak hanesan genus Gracilaria, Gelidiopsis no Galidiella. Iha area industria hahan nian uja hanesan material ba aihan, iha area saude “agar” ou babain koñesidu ho naran “agar rose” ida nee babain uja iha media moris ba bakteria (Media biakan bakteri)nomoos ai moruk ba anti disentri/diareia, no anti gondok. Iha seitor agrikultura uja hanesan media moris ba tesidu ai horis (tissue culture).

4.     Kompozisaun Kímiku

Kompozisaun kímika nebe lahanesan ba budu tasi afeita husi fatores sira nebe mak hanesan : diferensia jenétika, espésie, fatin moris, idade atu kolleta, nomos kondisaun ba ambiente (Ortiz et al., 2006; Sanchez-Machado et al 2004). Peritus Astorga-Espana et al. 2015, hateten katak Budu tasi matak, mean no kor kafé iha mineral nebe mak variável, hanesan budu tasi kor kafé iha mineral hanesan K = 31.4 g/kg, Ca=10.3 g/kg, kompara ho budu tasi mean K=14.1 g/kg, Ca= 3.11 g/kg, no budu tasi matak  K= 13.9 g/kg, Ca= 7.58 g/kg. Alende ida nee, budu tasi matak iha mineral balun nebe mak aas liu kompara ho budu tasi mean ho kor kafé, mineral sira ne mak hanesan: Mg=15.0 g/kg, Fe= 1260 g/kg, dan Cu= 7.46 g/kg. Bazeia ba mineral nebe mak iha katak konsumu 8 gram budu tasi maran, sei sustenta liu 25% nesesidade bazika minerais Mg, Fe, no Cu, iha ita nia isin lolon.

Nú.	Algae	Kompozisaun Kímika (g/100 g husi nia maran)
		Karbohidratu	Proteina	Lípida		Mineral
1.	Chlorophyceae (Matak)
	Ulva spp.	42.1	20-26,1	0.6-0.7		13.7-22.6
	Ulva lactuca	NA	10-21	NA		NA
	Enteromorpha spp.	61.5	20.7	0.3		6.6
2.	Phaeophyceae (Kor kafé)
	Laminaria spp	49.1	6.7	1.6	19.2
	Konbu	NA	8.1-15	1.8	25.4
	Undaria pinnatifida	47.8	12.7-14.1	1.5-2.7	21.2-32.8
	Hizikia fusiforme	29.8	5.6-12.3	0.8-1.5	21.2-35
	Fucus dictyota	NA	3-11	NA	NA
3	Rhodophyceae (Mean)
	Porpyra tenera	40.5	33-47	0.7-1.6	8.5-8.7
	Chondrus crispu	54.8	11.2	2.6	14.2
	Gracilaria	58.4	7.9	0.1	17.8

                Tabela 2. Kompozisaun kímika algae. Fontes : Bocanegra et al 2009. NA (Dadus seidauk iha)

5.     Kompozisaun komponente bioativu

Haree husi nia kompozisaun ba bioativu, algae bele sai potensia nebe mak boot iha produtu alimentar fungsional. Komponente bioativu iha budu tasi iha diversidade nebe mak makaas depende ba, espésie, kondisaun jeográfika, époka, ambiente, époka ba kolleta nian, temperatura bee nomos assaun durante kolleta. Hó nunee komponente bioativu iha budu tasi klean teb-tebes hanesan fenóliku, bio pigmentu, polisakarida sulfat, vibra nunee mos halozéniu (Erniati et al., 2016). 

a)       Komponente fenóliku

Kompostos fenoliku hanesan parte ida husi komponente biativu ne’ebé mak hetan barak iha algae ka budu tasi. Variasaun husi fenóliku ho nia kadar nebe mak lahanesan akontese wainhira halao ekstraksaun ba budu tasi ne’e no halao teste ba nia vantajen iha area saúde mak; ásidu fenolat (fenolat acid) catechin, phlorotannins, flavonoid tama mos ba iha flavon no flavonol glycosides identifika ona iha algae kor kafe, matak no mean (Keyrouz et al., 2011; Farvin no Jacobsen, 2013).

Phlorotanin hanesan kompostu polifenol ne’ebé derivada husi tanin ne’ebé so hetan deit iha algae kor kafe no nia konsentrasaun too 25% husi peso seco (Berat kering). Kompostu ne’e kria husi polimerizasaun phloroglusinol liu husi dalan asetat-malonat. Iha tipu phlorotanin oi-oin hanesan; fuhalol, phloretol, hidroksiphlorethol, eckol, bieckol no seluk tan (Firdaus, 2011). Alende phlorotanin, komponente bioativu fenoliku seluk husi budu tasi mos hatudu bioatividade. S. myriocystum dan T. ornata husi tasi mane Tamil Nadu, India iha mos kompostu ásidu fenolat no flavonoid nebe iha atividade antioksidan  (Jeyabalan no Marimuthu, 2012).

b)      Bio pigmentu (pigmentu natural)

Pigmentu natural nebe mak ezisti iha budu tasi klasifikadu ba parte prinsipal 3 mak hanesan algae matak, algae kor kafe no algae mean. Nune’e mos ba pigmentu natural prinsipal iha kompostu 3 mak klorofila, karotenoid no fikobiliproteina (Pangestuti no Kim, 2011).

Agrupamentu pigment bele mos haree hosi nia polaridade hanesan pigment polar (Hidrofílico) no non-polar (lipofílico). Pigmentu non-polar mak hanesan karotenoid no klorofila, bele ekstrair ho solvente orgâniku ho nia nível polaridade ne’ebé mak iha (índise polaridade d” 5,2). Alende ne’e, fikobilina hanesan pigmentu polar no asosia ho proteina. Buffer nune’e mos bee bele uja hodi halo ekstraisaun pigment fikobilina ida ne’e. (Masojidek et al., 2004). Komponente principal  pigmentu polar (fikobilin) Cyanobacteria kompostu husi kompostu 3 mak  fikosianina, allofikosianina, no fikoeritrina.

Hó detalla pigmentu natural ne’ebé mak ezisti iha algae tipu 3 mak hanesan iha tabela kraik ne’e;

Tipu algae	Espésie	Pigmentu natural
Matak (Chlorophyceae)	Enteromorpha compresa	Klorofil a, b,  β-karoten, Luteina, Violaxanthina, Antheraxanthina, Zeaxanthina, no Neoxanthina. Xanthophylls.
Mean (Rhodophycea)	Eucheuma cottonii	klorofil-a, d, karotenoid,  fikoeritrin, fikosianin, α no β-karotena no xanthophylls
Kor kafé (Phaeophyceae)	Padina australis Hauck	Derivadu Klorofila a, Trans-fukosantina, violaxhantina, β-karoteina no klorofila a no xanthophylls

Sumber : Merdekawati W. 2009, Wenno P.A., 2014 no Bocanegra et al. (2009)

Klorofil husi algae nee identifika ona iha atividade biologia nebe klean. Atividade biológika balun husi klorofil iha algae mak hanesan tuir mai ne :

Tipu klorofil	Atividade biológika	Fontes
Klorofil a	Antioksidan	Enteromorpha prolifera
Pheophytin a		Fucus vesiculosus
	Antimutagenic	Porpyra tenera
	Neuroprotective	Sargassum fulvelum
	Antimutagenic	Enteromorpha prolifera
	Anti-inflamatory	Enteromorpha prolifera
Pheophorbide a	antioksidan	Enteromorpha prolifera
Pyropheophytin a	antioksidan	Eisenia bicyclis
Phycoerythrobilin	antioksidan	Porphyra sp.

Tabela 3. Atividade biolózika husi klorofil. Fontes : Pangestuti no Kim (2011)

Karotenoid hanesan pigmentu natural ida ne’ebé mak eziste kuaze iha tipu algae hotu.  Karotenoid mos hanesan kompostu tetraterpens, carotenes (hydrocarbons) no xanthophylls ne’ebé iha mos kompostu oksizéniu. Husi péritus seluk mos hatete katak iha  tipu algae matak iha pigmentu hanesan karotenoid tipu  β-carotene, lutein, violaxanthin, neoxanthin no zeaxanthin. Ba algae mean iha pigmentu karotenoid tipu α- dan β-carotene, lutein no zeaxanthin. Alende ida ne’e, ba algae kor kafé iha deit β-carotene, violasantina no fukosantina (Holdt no Kraan, 2011).

Hanesan mos ho klorofila, karotenoid ne’ebé mak ezisti iha algae identifika ona iha atividade biolózika ne’ebé bele hadia no hasae saúde.  Lutein, β-karoten ne’ebé ekstrak husi Porphyra tenera identifika iha atividade antimutagenic ba bakteria Salmonella typhimurium (Okai et al., 1996) Alende ida ne’e, fukosantina mos hanesan pigmentu husi karotenoid ne’ebé peskiza ona no identifika iha atividade biolózika ne’ebé mak klean kompara ho karotenoid sira seluk iha algae kor kafé (Kim dan Pangestuti, 2011). Atividade biolózika fukosantina ne’ebé mak ezisti iha algae kor kafé kaer funsaun alende hanesan antioksidan, anti kankru, anti-inflamasaun, anti obesidade no seluk tan, bele mos hatuun nível trigliserida no kolesterol iha ita nia isin (Ximenes, 2017).

Pigmentu natural fikobiliproteina hanesan proteina fluoresent ne’ebé bele kahur ho bee. Fikobiliproteina mos hanesan fotoreseptor prinsipal iha prosesu fotosintesa algae mean nian. Kor husi Fikobiliproteina mosu tanba iha ligasaun kovalen grupu prostétiku, bilins ne’ebé linear ho tetrapirol derivada biosintesa Heme liu husi biliverdin. Iha tipu 3 husi Fikobiliproteina, mak : fikosianina, alofikosianina no fikoeritrina.

Fikoeritrina hanesan fikobiliproteinas ne’ebé jeralmente domina iha algae mean(Pangestuti dan Kim, 2011). Fikosianina ho kor azul, fikoeritrina prodúz kor violeta (ungu) no fikoeritrosianina  ho kor orange. Kadar fikobiliproteinas iha algae mean komesa husi 8 – 32,7 % (maran) (Sekar no Chandramohan, 2008). Rezultadu peskiza ida hatudu katak fikobiliproteina hatudu atividade biolózika ne’ebé variável hanesan antioksidan, anti inflammatóriu, neuroprotective, hypocholesterolemic, hepatoprotective, anti-tumour, liverprotecting, atherosclerosis treatment, serum lipid-reducing no lipase inhibition activities (Sekar no Chandramohan, 2008).

c)       Bioativu polisakarida

Polisakarideo hanesan komponente ida ne’ebé mak prinsipal husi algae (40-65% husi totalidade massa) nebe forma husi hidrokoloidu formador ba parede selula nian no material ba enxedor fatin entre selula (Meillisa et al, 2015, Santi et al., 2012). Polisakarídeu prinsipal ne’ebé mak identfika ona iha atividade biolózika (bioatividade) iha algae mak polisakarídeu sulfat.

Hó detallamente polisakarideo sulfat ne’ebé iha algae ho nia atividade biolózika bele haree iha tabela kraik ne;

Tipu algae	Komponente bioativu	Fontes	Atividade
Algae kor kafé	Fucan	Adenocytis urticularis	Antiviral activity
	B-glucan	Thamnolia vermicularis	Atividade imunomodulador
	Galactofuranman nans	Thamnolia vermicularis	Atividade imunomodulador
	Fukoidan	Ecklonia cava	Atividade anti-inflamatóriu
	Alginat	Sacharina latissima	Anti-baktéria
		Undaria pinnatifida	Anti-kankru
	Laminaran	Sacharina latissima	Anti-viral
		Laminaria hyperborea	Hypocolesterómiku
Algae mean	Porphyran	Porphyra haitanensis	Antioksidan, antikoagulan
	Carrageenan	Chondrus crispus	Antikoagulan
		Eucheuma cottonii	Hypocolesterómiku
Algae matak	Rahmnam sulfat	Manostroma latissinum	Antikoagulan
	Ulvan	Ulva lactuca	Antitumor
		Manostroma sp.	Anti influenza

Tabela 4. Bioativu polisakarideu sulfat no atividade biolóziku nebe ezisti iha algae. Fontes: liu et al.,2015; Holdt no Kraan.,2011.

d)      Komponente vibra (viber)

Vibra hanesan komponente ida ne’ebé mak importante los iha material hahan natural, liu-liu ba protesaun ba saude no ekilibriu ba funsaun sistema dijestóriu. Vibra iha hahan koñesidu hanesan vibra dieta ka dietary fiber, hanesan parte ida husi aihoris nebe ema bele konsumu no forma husi karboidratu, ne’ebé iha sifat  resistan ba prosesu dijestóriu no absorsaun iha intestinu grosu ema nian nomoos sofrer fermentasaun sorin deit ka hotu iha intestinu delgadu.

Vibra ida ne’e hanesan parte ida husi aihan ne’ebé mak labele hidrolisa husi enzima dijestóriu (Santoso, 2011). Peskiza ne’ebé mak elevadu hatudu ona katak maske vibra ne’e laos substânsia ba nutrisaun, vibra aihan iha funsaun ne’ebé importante liu afeita akontese kondisaun fisiolojikamente no metabolika ne’ebé bele fo protesaun no saúde ba vias dijestóriu, liu-liu iha intestinu grosu no kolon (Kusharto, 2006).

Iha estudu balun hatudu katak budu tasi hanesan material ne’ebé potensial sai fontes vibra hahan hó nia keunggulan kompara material hahan ba aihoris iha rai maran (Dwiyitno, 2011). Nune’e mos budu tasi ne’ebé mak identifika ona iha peskiza iha vibra ne’ebé  mak aas . vibra iha budu tasi  variável husi 36-60% peso seco, entertantu 55-70% hanesan vibra ne’ebé mak terlarut ne’ebé  kompostu husi alginat no carrageenant ho nia total ne’ebé variável depende husi tipu budu tasi no kondisaun ambiente.

e)       Kompostu halogéniu

Kompostu halojéniu iha budu tasi hanesan kompostu metabolit segundu, bai-bain nia kompostu husi Ion Halojéniu hanesan Ion clorida ka Bromida iha ninia estrutura kímika (Cabrita et al., 2010). Jeralmente, iha tipu rua husi kompostu halojéniu ida ne’e mak kompostu halojéniu non volatile no kompostu halojéniu  volatile (Gupta dan Ghannan, 2011). Kompostu halojéniu mos dalaruma tama ba iha tipu hanesan  monoterpena ka diterpena no sesqueterpen (Cabrita et al., 2010).

Bioatividade kompostu halojéniu budu tasi mos komesa identifika ona iha tinan hira ikus ne’e. kompostu halojéniku husi tipu terpenoid mak fallachromenoic acid ne’ebé isolasi husi budu tasi kor kafé Sargassum fallax, iha tasi Australia hatudu nia atividade anti kankru, (eksperimenta in vitro ba sélula leukemia), kompostu halojéniu bromophenols husi ekstraksaun budu tasi  Polysiphonia morrowii hatudu atividade antiviral. Nune’e mos diterpen ne’ebé halo ekstraksaun husi budu tasi Dictyota pfaffii no  Dictyota menstrualis bele fo infeksaun virus herpes tipe I ho métodu in vitro (Michalak no Chojnacka, 2015). Iha parte seluk, diterpen iha oin 2 mak hanesan 4,18-dihydroxydictyolactone no 8,11 dihydroxypachydictyol ne’ebé isolasi husi Dictyota hatudu atividade anti tumor sélula carcinoma ho in vitro (Gupta no Ghannam, 2011).

6.     Potensia iha area industria

Konteudu husi budu tasi nebe mak utiliza ona iha seitor industria mak hanesan ;

1.      Agar

Agar hanesan produtu prinsipal nebe mak produz husi budu tasi klase Rhodophyceae hanesan Gracilaria, Sargassum no Gellidium . agar iha kapasidade hodi produz Gel ka Film, hodi ida ne’e mak utiliza hanesan emulsifier, stabilizer, formador ba Gel, pensuspensi, pelapis, no inhibitor. Iha industria hahan nian, agar utiliza hanesan industria ice cream, keju, jelly, rebisadu no susu kor kafé. Iha parte seluk, agar mos utiliza iha area bioteknolojia hanesan, media ba moris fatin mikrobia nian (agar rose), fungus, yeast, no makroalga nomos rekombinasaun DNA no elektroforesis.

                                    Imajen 1. Produtu agar Gracilaria skala industria; a. Agar strips, b. Agar Stick-                                                     shape c. Variasaun agar ho modelu bebidas no hahan. d. Agar ba                                                       media iha area mikrobiologia, no produtu agar sira seluk. Fontes (Suparmi  & Sari A., 2009).

2.      Fikokoloidu

Fikokoloidu hanesan tipu polisakarida ne’ebé produz husi ekstraisaun budu tasi. Fikokoloidu bele forma gel, nune’e barak utiliza hanesan emulsifyer (pengental) no stabilizador ba hahan (Raven et al., 1986). Fikokolidu nebe mak produz husi algae ou budu tasi mean ne’e bele mos utiliza iha industria farmasia, aihan  no kosmetika (Winarno, 1996)

3.      Karagenan

Algae ka budu tasi nebe prinsipal produz karagenan mak, Carrageenate no nia derivada (turunan) hanesan Chondrus crispus no espésie seluk hanesan Gigartina, espesial Gigartina stellata nomos Eucheuma no Hypnea. Alende ida nee mos sei iha fontes seluk hanesan Chondrococcus hornemannii, Halymenia venusta, Laurencia papillosa, Sarconema filiforme, no Endocladia. Gellidium sira seluk hanesan Gymnogongrus, Rhodoglossum, Rissoella, espécie Yatabella no algae sira seluk ne’ebé mak pertense ba algae mean.

Karagenan bain-bain utiliza iha industria farmasia hanesan emulsifyer (nuudar ezemplu iha emulsi minyak hati), hanesan substansia granulasaun no pengikat (ezemplu hanesan tablet, elexier, no sirup). Hanesan sira seluk karagenan mos utiliza ona iha industria kosmetika hanesan stabilizer, suspensaun no pelarut. Produtu kosmetika nebe mak bai-bain uza mak hanesan salep, krim, lottion, pastadente, tonic fuuk, stabilizer sabaun, mina nebe proteze husi loron manas no seluk tan.

Tuir dadus FAO nian tinan 2000 kona ba kuantidade budu tasi nebe utiliza iha setor industria hanesan iha tabela kraik ne;

 

Tabela 4. Kuantidade budu tasi nebe utiliza iha setor industria. Fontes: FAO 2000

                  iha (Pangestu & Kusmita, 2007)

7.     Potensia sai hanesan material ba Biodiesel

Ezistensia budu tasi hanesan fontes ba enerjia alternativa sei la impede utilizasaun fatin iha rai maran. Utilizasaun budu tasi ida ne’e klean tebes no besik los ho ema nia moris. Agora dadaun ne’e fontes energia mundu sei domina husi fontes sira ne’ebé mak nanis kedan (mina, batubara, no gas) mak kuaze 80,1%, nakfahe ba mina 35,03%, batubara 24,59% no gas 20,44%. Fontes enerjia ne’ebé ita utiliza dadauk ne’e, ida risku boot mak hanesan enerjia nuklir 6,3%. Alende ida ne’e fontes enerjia ne’ebé foun foin mak 13,6%, liliu biomassa tradisional kuaze 8,5%. Sira ne’ebé tama ba fontes ida foun mak hanesan solar cell, anin, enerjia husi bee, manas husi rai, no bio-enerjia. Vantajen estabelesimentu bioenerjia klaru ona hanesan:

a)     Foun no iha kontinuasaun

b)     Moos no efisiente

c)      Neutral husi komponente karbonu, sei afeita negativu fali ba karbonu

d)     Bele troka mina ba transporte

e)     Hamenus global warning no polusaun ár, polusaun bee, no

f)       Hataan dependentemente ba enerjia ne’ebé mak tuan (Zulham, 2008).

Bibliografia:

Atmadja, W. S., A. Kadi, Sulistijo, dan Rachmaniar. 1996. Pengenalan Jenis-Jenis Rumput Laut Indonesia. Puslitbang Oseanologi-LIPI, Jakarta, p. 56–78.

Aline, M., Lima, F., Soldi, V. Borsali, R. (2009). Dynamic Light Scattering and Viscosimetry of Aqueous Solutions of Pectin, Sodium Alginate and Their Mixtures: Effects of Added Salt, Concentration, Counterions, Temperature and Chelating Agent, J. Braz. Chem. Soc. Vol.20 (9).

Astorga-Espana, M.S., Galdon, B.R., Rodrıguez, E.M., Romero, C.D., 2015. Mineral and trace element concentrations in seaweeds from the sub-Antarctic ecoregion of Magallanes (Chile). J of Food Comp and Analy. 39: 69–76. doi:org/ 10.1016/j.jfca.2014.11.010.

Burtin, P. 2003. Nutritional value of seaweeds. Electronic Journal of Environmental, Agricultural, and Food Chemistry. ISSN: p.1579–4377.

Bocanegra, A., Bastida, S., Benedi, J., Rodenas, S., Sanchez-Muniz F.J., 2009. Characteristics and nutritional and cardiovascular-health properties of seaweeds. J Med Food. 12 (2) : 236–258. doi:10.1089/jmf.2008.0151.

Cabrita, M.T., Vale, C., Rauter, A.M., 2010. Halogenated
compounds from marine algae. Marine Drugs. 8: 2301-
2317. doi:10.3390/md.8082301.

Domettila, C., Brintha, T.S.S., Sukumaran, S., & Jeeva, S. (2013). Diversity and distribution of seaweeds in the Muttom coastal waters, south-west coast of India. Biodiversity Journal, 4(1), 105-110.

Dubinsky,Z.,T.Berner and Saaronson 1978. Potential of large algae culture for biomss and lipid production in Prid Lands. In : Biotechnology in energy production and conservation. ( C. D. Scott ed.). Biotechnology and Bioengenering Symp. S. John wille & Sons :51-68.

Dwiyitno, 2011. Rumput laut sebagai sumber serat pangan
potensial. Squalen. 6(1) : 9-17.

Erniati,  Zakaria F.R, Prangdimurti E., & Adawiyah D.R. Seaweed potential: bioactive compounds studies and its utilization as a functional food product. Program Studi Budidaya Perairan, Fakultas Pertanian, Universitas Malikussaleh. Departemen Ilmu dan Teknologi Pangan, Fakultas Teknologi Pertanian, Institut Pertanian Bogor. Acta Aquatica, 3:1 (April, 2016): 12-17.

Farvin, K.H.S., Jacobsen, C., 2013. Phenolic compounds and
antioxidant activities of selected species of seaweeds
from Danish coast. J Food Chem. 138: 1670–1680.
doi.org/10.1016/j.foodchem.2012.10.078.

Ferawati E., widyartini D.S., Insan I.. 2014. Studi komunitas rumput laut pada berbagai substrat diperairan pantai permisan kabupaten cilacap. Scripta Biologica | Volume 1 | Nomer 1 | Maret 2014 | 55-60.

Gupta, S., Ghannam, N.A., 2011. Bioactive potential and possible
health effects of edible brown seaweeds. Trends in Food
Sci and Technol. 20: 1-12. doi:10.1016 /j. tifs.2011.03.011.

Holdt, S.L., Kraan, S., 2011. Bioactive compounds in seaweed:
Functional food applications and legislation. J Applied
Phycol. 23: 543–597. Doi: 10.1007/ s10811-010-9632-5

Jeyabalan, J.P.P., Marimuthu, J., 2012. Preliminary
phytochemical analysis of Sargassum myriocystum and Turbinaria ornata from the Southern Coast of Tamil
Nadu, India. J Tropical Biomed Asian Pacific. 4 : 1-4.

Keyrouz, R., Abasq, M.L., Bourvellec, C.L., Blanc, N., Audibert, L.,
Argall, E., Hauchard, D., 2011. Total phenolic contents,
radical scavenging and cyclic voltammetry of seaweeds
from Brittany. Food Chem. 126: 831–836. doi:
10.1016/j.foodchem.2010.10.061.

Korang Republika co.id,  edisi selasa,18 september 2018

Kusumastuti, K. 2008. Pengaruh Pengeringan Terhadap Komposisi dan Kandungan Pigmen Algae Hijau Caulerpa sp. Skripsi. Universitas Diponegoro. Semarang.

Kusharto, C.M., 2006. Serat makanan dan peranannya bagi
kesehatan. J Gizi dan Pangan. 1(2) : 45-54.

Liu, J., Willfor, S., Xu, C., 2015. A review of bioactive plant
polysaccharides: Biological activities, functionalization,
and biomedical applications. Bioactv Carbohydr and
Diettary Fibre. 5: 31 – 61. doi: org/10.1016/ j.bcdf. 2014.
12.001.

Meillisa, A., Woo, H.C., Chun, B.S., 2015. Production of
monosaccharides and bio-active compounds derived
from marine polysaccharides using subcritical water
hydrolysis. J Food Chem. 171: 70–77. doi.org/10.1016/ j.
foodchem. 2014.08.097.

Merdekawati W, Susanto AB. Kandungan dan komposisi pigmen rumput laut serta potensinya untuk kesehatan. Magister Biologi, Universitas Kristen Satya Wacana. Fakultas Perikanan dan Ilmu Kelautan, Universitas Diponegoro, Squalen Vol. 4 No. 2, Agustus 2009.

Michalak, I., Chojnacka, K., 2015. Algae as production systems of
bioactive compounds. Eng Life Sci. 15: 160–176. doi: 10.1002/elsc.201400191.

Okai, Y., Hiqashi, O., Yano, Y., Otani, S., 1996. Identification of
antimutagenic substances in an extract of edible red alga Porphyra tenera (Asadusa-nori). Cancer Letters. 100:
235–240.

Pangestuti, R dan L. Kusmita. 2007. Sejuta Manfaat Warna yang Tak
Tergali Dari Rumput Laut. Makalah disampaikan dalam Seminar
Pigmen Rumput Laut di Jurusan Ilmu Kelautan FPIK Universitas
Diponegoro, Semarang (4 Agustus 2007).

Pangestuti, R., Kim, S.K., 2011. Biological activities and health
benefit effects of natural pigments derived from marine
algae. J Functl Foods. 3: 255-266. doi:
10.1016/j.jff.2011.07.001.

Raven, P, H. R, F, Evert dan S, E, Eichorn. 1986. Biology of Plants. Fourth
Edition. Worth Publishers, Inc. New York. 775 p.

Reskika Andi. 2011. Evaluasi potensi rumput laut coklat (Phaeophyceae) dan rumput laut hijau (Chlorophyceae) asal perairan takalar sebagai antibakteri vibrio spp. FAKULTAS ILMU KELAUTAN DAN PERIKANAN. Universitas Hasanuddin. Makasar.

Sekar, S., Chandramohan, M., 2008. Phycobiliproteins as a
commodity: trends in applied research, patents and
commercialization. J Appl Phycol. 20:113–136. doi:
10.1007/s10811-007-9188-1.

Santi R.A., Sunarti, T.C., Santoso, D., Triwisari, D.A., 2012.
Komposisi kimia dan profil polisakarida rumput laut hijau.
J Akuatika. 3 (2) : 105-114.

Santoso, A., 2011. Serat pangan (dietary fiber) dan manfaatnya
bagi kesehatan. Magistra. 75 (23): 35-40.

Smith, d. G. and g. E. Yonge 1955. The combined amino acid in several species of marine algae. J. Biol chem.: 645 - 853.

Soenardjo N. Aplikasi Budidaya Rumput Laut Eucheuma cottonii (Weber van Bosse) Dengan Metode Jaring Lepas Dasar (Net Bag) Model Cidaun. Buletin Oseanografi Marina Oktober 2011.vol.1 36 – 44.

Suparmi & Achmad Sahri. Mengenal Potensi Rumput Laut : Kajian Pemanfaatan Sumber Daya Rumput Laut Dari Aspek Industri Dan Kesehatan. Sultan agung vol xliv no. 118 juni – agustus 2009.

Wang, W.J., Wang, G.C., Zhang, M., and Tseng, C.K. (2006). Isolation of Fucoxanthin from the Rhizoid of Laminaria japonica Aresch, J.
Integrative Plant Biology, 47(8), 1009-1015.

Wenno P. A. Pertumbuhan Dan Kandungan Pigmen Dari Rumput Laut Merah Kappaphycus Alvarezii (Doty), Hasil Budidaya Di Perairan Dengan Kedalaman Berbeda. Jurnal TRITON Volume 10, Nomor 2, Oktober 2014, hal. 71 – 78 73.

Winarno, F, G. 1996. Teknologi Pengolahan Rumput Laut. Pustaka Sinar
Harapan. Jakarta. 107 Hlm

Ximenes S. M. 2017. Pengaruh Kombinasi Pigmen Fukosantin Dan Kurkumin Dalam Mencegah Obesitas Pada Mencit (Mus Musculus) Balb/C. Program Pasca Sarjana Magister Biologi, Universitas Kristen Satya Wacana. Salatiga, Semarang-Jawa Tengah. Indonesia.

Yunizal, Tazwir, Murtini, J.T., no W ikanta, T.
Penelitian penanganan rumput laut coklat (Sargassum filipendula) setelah dipanen menggunakan larutan kalium hidroksida. Octopus.
2000. 4(1): 49–56. http://eprints.undip.ac.id/3753/1/makalah_peneli
tian_Rizki_dan_Marita. diakses pada tanggal 20 April 2012.

Zulham, A. 2008. Indonesia Menjajagi Pengembambangan Biodisel Dari
Rumput Laut. E-bulletin Pasar Ikan (10 Januari 2009).